Dat is nu all en lange Tiet her, dat min platt-
dütsche Gedichten un Geschichten in’t „Hamburger
Echo“, Spalte „Rund um den Familientisch“, druckt
weern un – as mi dat to Ohren keem – vun Groot
un Lütt geern leest wörn. Männigeen hett mi loter –
as dat „Hamburger Echo“ sien Erscheinen instellt
harr un ick de Gedichten dorch Johren op allerhand
Veranstaltungen mit groten Erfolg vördrägen hevv –
froogt, wat man se nich druckt käupen kunn. Je,
Frünn’, dat weer nich so eenfach, un irst hüüt, wo
dat Plattdütsche wedder „in“ is, sall nu en Deel
dorvun druckt mit beste Wünschen an min
Lesers rutgohn. Wat min Person angeiht, so will ick ju
seggen: Üm de Johrhunnertwende keem ick in
Hamburgs „Altstadt“ an’n Hoppenmarkt to Welt.
Min Vadder harr dor en Loden un dreev en goden
Hannel mit de Buern ut Veerlannen, Altenlande,
Ossenwärder usw., de den Markt daagsöver
besöchen. De Atmosphäre in uns Loden, op den Markt un
ok in de olen Stroten vun de Altstadt hevvt mi
al domols prägt un mookt ut mi, wat ick hüüt
noch bün. De grote Leev to Hamborg keem mehr
un mehr in min Hart. Un dat Musische, dat
al vun Öllernsiet in mi leeg, wörr weckt un pleggt
in’t „Paulsenstift“, min leeve unvergetene Schol,
un in 8 Johren Beseuk vun’t Konservatorium
der Musik.
Ehr Luise Ortlieb
Januar 1980